Leioako Udalak jarduera fisiko orientazio zerbitzuari ekingo dio berriro

 

 

Udako etenaldiaren ondoren, Leioako Udalak Jarduera Fisiko Orientazio Zerbitzua jarriko du martxan berriro, irailaren 8an. Zerbitzua doakoa eta herritar guztientzat irekia. Zerbitzu horrek bizi-ohitura osasungarriak sustatu nahi ditu, herritarrak sedentarismoa atzean uztera eta ariketa fisikoa egitera animatuz.

Pertsona guztiei zuzenduta dago, baina, batez ere, ez-aktiboenei, eguneroko bizitzan ongizatea eta bizi-kalitatea handitzeko errutinak izan ditzaten.

Jarduera fisikoko profesional bat arduratuko da zerbitzu horretaz, eta erabiltzaileei aholkuak, orientabideak eta laguntza emango dizkie, erabiltzaileek jarduera fisikoari buruzko ohiturak hobe ditzaten, ohiko moduan egitea lortu arte. Pertsona bakoitzari lagunduko dio berarentzat egokiena den jarduera identifikatzen, programa bat proposatuko dio, edo komeni zaizkion udalerriko jardueren berri emango dio, eta komunean jarritako helburuen betetze-mailaren jarraipena egingo du. Gainera, indarra, oreka, erresistentzia eta malgutasuna lantzeko tailer espezifikoak emango dira, ongizate orokorrari laguntzeko.

Zerbitzu ibiltaria da, beraz, bizilagunak gertutasunagatik edo erosotasunagatik gehien komeni zaien puntura hurbildu ahal izango dira:

• Asteartea: 11:00-13:00 Sabino Arana, 67 (Gizarte Zerbitzuen lokala) / 16:30-18:30 Pinueta (SAC-Txoko Gaztelubide, Langileria Kalea, 202 Etxabe)
• Asteazkena: 17:30-19:30 Sabino Arana, 67 (Gizarte Zerbitzuen lokala)
• Osteguna: 11:00-13:00 San Bartolome (Kultur Etxea, 1 Etxabe)
• Ostirala: 09:00-11:00 Txorierri (Kultur Etxea, 51 Behera) / 11:00-13:00 Lamiako (Langileria Kalea, 88 Etxabe)

Zerbitzuak 156 pertsona artatu ditu dagoeneko, gehienak emakumeak (109), eta batez beste 62 urte dituzte.

KLUB ETA KIROLARIENTZAKO KIROL DIRULAGUNTZAK

Kirol-orientazioko programa horri kirol-jarduera sustatzeko dirulaguntzen deialdia ere gehitu behar zaio. Udalerrian kirola sustatzeko dirulaguntzak dira: klubentzako dirulaguntzak, dibertsitate funtzionala duten pertsonei zuzendutako jardueretarako; eta lehiaketetako banakako kirolarientzako dirulaguntzak.

Lehenengoaren kasuan, udalerriko elkarteek dibertsitate funtzionala duten pertsonei zuzendutako kirol-jarduerak sustatzen laguntzea da deialdi honen helburua.

Leioako Udal eta Autonomia Erkidegoko erregistroan 2024ko irailaren 1etik 2025eko abuztuaren 31ra bitartean inskribatuta dauden eta dibertsitate funtzionala duten pertsonei zuzendutako kirol-jarduerak garatu nahi dituzten kirol-elkarteak izango dira laguntza hauen onuradunak.

Eskaera egiteko epea irailaren 30ean amaituko da (hau barne). Leioako Udalaren egoitza elektronikoaren bidez izapidetu ahal izango da online (https://udaletxean.leioa.eus/).

Banakako kirolarientzako laguntzen kasuan, deialdiaren helburua da dirulaguntzak ematea Leioan bizi diren eta ohiko lehiaketa-jarduera banaka egiten duten kirolariei. Dirulaguntza bakarra emango da kirol-modalitate eta sexu bakoitzeko, eta lehentasuna emango zaio puntuaziorik handiena lortzen duenari.

Dirulaguntza hauen onuradun izango dira 1984 eta 2009 urteen artean jaiotako kirolari ez-profesionalak, federazio-lizentzia dutenak eta 2024ko urriaren 1etik 2025eko irailaren 30era banaka lehiatu direnak.

Eskaerak egiteko epea urriaren 1etik 30era izango da (biak barne). Leioako Udalaren egoitza elektronikoaren bidez (https://udaletxean.leioa.eus/) edo aurrez aurre izapidetu ahal izango da Udalaren edo Gaztelubideren Herritarren Arretarako Zerbitzuetan.